2020-11-28 17:26:40
早晨，我係2019年11月11日黎明行動搞手。冇錯，連我哋呢個Channel都要收皮啦，我哋的確係驚咗，因為我哋呢度每一個人都有自己家庭責任人生需要繼續，而我哋一致認為呢個telegram頻道已經冇乜用，我自己本身都係一個平凡人，當初只為積極將運動轉型，從未諗過由一九年嘅11月開始，會發展出香港抗爭最激烈嘅時期，好感激一路以來每一個願意上街同行嘅人民、國際陣線嘅大佬們，我呢世都會將2019年永記於心，之後恐怕我哋都唔會再舉辦任何活動，所以選擇關閉頻道。
係關閉頻道之前，希望大家可以花少少時間睇埋下面嘅文字。
今年年頭開始出現所謂Lunch哥行為，有人吹捧，有人反感，即係佢將自己冠以「星級抗爭團隊」，自立英雄，享受盲撐粉崇拜嘅目光，將原本歸於勇和及被捕手足嘅榮光強行投放自己身上。Lunch哥嘅「星級」同我哋「普通手足」有咩分別呢？難道以51手勢便能夠光復香港、推翻中共？難道我哋手足一定要將自己做過嘅事講晒出嚟先可以受社會大眾承認？自從lunch哥濫用「51」之手勢，成個社會好似真係覺得每日喺商場舉手勢睇報紙就可以帶領香港走向勝利推翻中共等等需要付出沉重代價嘅革命。係嘅，如果你講大家咁樣做可以令到香港人保持抗爭熱度，提醒香港人我哋仍未勝利，其實我建議你哋大可以得閒去法庭擔當被捕手足嘅旁聽，你會見到手足一次比一次憔悴嘅模樣，屋企人每當離別之時不捨流淚嘅眼神，以及冷血無情嘅香港司法制度。所謂維持抗爭熱度，其實只係每一個真正愛香港人嘅自覺，假如你嘅初衷一直冇變，你絕對唔需要其他人提醒。而明顯，Lunch哥的初衷變質了。我哋明白佢嘅初心，但呢場運動咪就係大家不斷反思犯過嘅錯誤，改過，然後做得更好？不過呢兩個月以來，正常人都可以睇得出lunch哥唔再聽其他人意見，一旦有人提出建議，就會話佢係鬼，而lunch哥嘅粉絲亦都會隨之攻擊提出建議嘅人。
經過Lunch哥事件，冇人會再將目光關注喺真正付出人生光陰、身心因此而受傷嘅手足，我更加唔會想再舉呢個51手勢，因為已經被濫用到戇鳩。按照盲撐粉嘅想法，的確我哋一眾2019年抗爭活動搞手、理大中大一役嘅手足、擁有高級裝備嘅手足，只能夠被Lunch哥同佢嘅「粉絲」指責為鬼，永遠無法媲美「星級抗爭團隊」嘅英勇抗爭事件簿。總而言之，我哋勇武係唔撚會承認Lunch哥可以帶領香港人走向勝利。
最後講個事實俾大家聽，真正嘅勇武其實真係所剩無己，我哋當然希望有新一代受啟發嘅人民願意企出嚟，但我哋最想大家將一路以來以鮮血灌溉的榮光歸於勇武、和理非、國際陣線、醫療服務團隊以及記錄真相嘅記者身上。
有緣一齊，食雪糕啦
25.7K viewsedited 14:26
有
